༢༠༢༠ ལོའི་སེར་སྨད་དགུ་གཏོར་ཆེན་མོའི་གསལ་བསྒྲགས།
༈ དགུ་གཏོར་ཆེན་མོའི་ངོ་སྤྲོད་དང་ཕན་ཡོན་ཟུར་འབུལ་ཞུས་པ་གཞིར་བཟུང་། བོད་ཤིང་ལུག་ལོའི་ལོ་ཧྲིལ་པོ་འདི་ནི་དམིགས་བསལ་སྤྱི་ནོར་༧གོང་ས་༧སྐྱབས་མགོན་ཆེན་པོ་མཆོག་གིས་དབུས་རིས་མེད་སྐྱེས་ཆེན་དམ་པ་རྣམས་སྐུ་ཚེ་བརྟན་ཅིང་རྣམ་དཀར་གྱི་བྱེད་སྒོ་མཐའ་དག་༧གོང་ས་མཆོག་གི་སྐུའི་གསང་བ་གསུམ་ལ་འགལ་རྐྱེན་ཅི་མཆིས་མིང་གི་ལྷག་མར་ཞི་ནས་རྣམ་དཀར་མཛད་འཕྲིན་ཉི་ཟླའི་འོད་སྣང་ས་གསུམ་ན་ཁྱབ་པ་དང་། དེ་ལ་བརྟེན་ནས་སངས་རྒྱས་ཀྱི་བསྟན་པ་རྒྱས་པ་དང་སེམས་ཅན་ལ་བདེ་སྐྱིད་འབྱུང་བ། ལྷག་པར་དེང་གི་ཏོག་དབྱིབས་རིམས་ནད་ཀྱི་འགལ་རྐྱེན་མཐའ་དག་རྨེག་མེད་དུ་ཞི་ནས་མཁའ་ཁྱབ་ཀྱི་སྐྱེ་འགྲོ་རྣམས་ཕན་ཚུན་བྱམས་བརྩེའི་མཛའ་བས་ཞི་བདེའི་དཔལ་ལ་སྤྱོད་ཐུབ་པ་སོགས་ཀྱི་ཆེད་དུ་དམིགས་སྟེ་སྤྱི་ལོ་ ༢༠༢༠ སྤྱི་ཟླ་ ༢ ཚེས་ ༡༩ དང་། བོད་ཟླ་ ༡༢ ཚེས་ ༢༦ ནས་ཉིན་བཞིའི་རིང་རྒྱལ་སྲས་བླ་སྤྲུལ་ཁག་དང་། བཀའ་རབ་འབྱམས་དགེ་བའི་བཤེས་གཉེན་རྣམས་གདན་འཛོམས་ཏེ་ཡི་དམ་ཆོས་སྲུང་རྣམས་ལ་ཐུགས་དམ་བསྐང་བ་དང་། ཐུགས་རྒྱུད་བསྐུལ་ཞིང་འཕྲིན་ལས་བཅོལ་བའི་ཆོ་ག་གནད་སྨིན་གྱི་སྒོ་ནས་དགུ་གཏོར་ཆེན་མོའི་གཏོར་སྒྲུབ་དབུ་འཛུགས་གནང་རྒྱུ་ལགས་ན་དེ་དོན་དགོངས་འཇགས་ཐོག་སེར་སྐྱ་མི་མང་ཚང་མས་ཐུགས་སྨོན་མཚམས་སྦྱོར་དང་འབྲེལ་མཉམ་ཞུགས་གནང་ཐུབ་པའི་དགེ་བསྐུལ་ཞུ།།
བོད་ཟླ་ ༡༢ ཚེས་ ༢༩ ཉིན་བསྟན་སྲིད་ཀྱི་ཞབས་རིམ་དུ་མགོན་ཁང་སྐང་གསོ་བ་རྣམས་ནས་གཏོར་སྒྲུབ་ཞུ་ཏེ་གཟོར་འཕེན་གཏོར་རྒྱག་བྱེད་པ་དང་། གོང་གསལ་བྱེད་སྒོ་ཁག་ནི་སྔོན་བོད་ནང་ཡོད་པ་བཞིན་སྔར་སྲོལ་བཟང་པོ་མ་ཉམས་པར་གང་ཐུབ་ཀྱི་ཚུལ་དུ་ཞུ་བཞིན་ཡོད། སྤྱིར་དགུ་གཏོར་ཆེན་མོ་ནི་ཉིན་གསུམ་འཚོག་རྒྱུ་ཡོད་པ་ལས་ཉིན་ཐ་མ་གཟོར་འཕེན་གཏོར་རྒྱག་སྐབས་གྲྭ་ཚང་དབུ་ཆོས་གཉིས་ནས་སྤོས་སྣེས་གཏོར་གྲུབ་པ་རྣམས་རིམ་བཞིན་གྲྭ་ཚང་མགོན་ཁང་ནས་ཕྱིར་ཐོན་ཏེ་གཏོར་རྭ་ནང་མར་གཏོར་གྲུབ་དབུ་མཛད་ནས་གར་འཚམས་རྒྱས་པར་མཛད། སློབ་དཔོན་ནས་གསེར་སྐྱེམས་ཕུལ་རྗེས་འཕྱར་དར་བ་བཅོ་བརྒྱད། དུང་རྒྱ། རྐང་གླིང་པ། ལམ་གཏོར་བ། གསེར་ཚག་སྤོས་འཕོར་བ། གསེར་སྐྱེམས་ཡོ་བྱེད་སྟེག་མི། རྔ་རོལ་བ་དང་བཅས་ན་བཟའ་གཟབ་མཆོར་ཐོག་རིམ་བཞིན་གཏོར་རྭ་ཕྱི་མར་ཐོན་ཏེ་གཏེར་བཟློག་གྲུབ་པ་དང་། གྲྭ་ཚང་གི་རྡོ་བཅལ་མཐིལ་དུ་ཆོས་རྒྱལ་གྱི་གི་གུ་མུ་ཏིག་རུས་པའི་རྒྱན་དྲུག་གིས་བརྒྱན་པ་དེའི་མདུན་དུ་མངའ་གསོལ་མཛད།
